لولا المواقف ما عرفت الرجاجيل .. وكان استوى بالهرج خايب ورجال

لولا المواقف ما عرفت الرجاجيـل
والرجل يعرف بالشدايد والافعـال



أنا اشهد إن به ناس وقت البهاذيـل
لاجد وقت الجد تطرى على البـال



من يعجبونك في جميـع المداخيـل
قوم تعز الطيب مـن كـل مدخـال



وترى العمر ما هوب فرق المشاكيل
والهرج ما يرفع من الناس دجـال



بعض الرجال كبار لكـن مهابيـل
المرجلة ما هيـب بالكبـر والمـال



وبعض الرجال اجسام لكن تماثيـل
جسمٍ كبير وداخلـه قلـب تمثـال



يملى عيونك بالشكـل كنـه الفيـل
ولا حل يوم الجد كذبـت الاشكـال



ما ينفعك وقـت الشقـا والغرابيـل
يا ليت تسلم من كلامـه والاقـوال



ومنهو يظن ان المظاهـر دواليـل
به ناس نقص وتلبس شماغ وعقـال



كالدلة اللـي دون نـار ومعاميـل
ما تسقي الخرمان لو ربـع فنجـال



وبعض الرجال يكيد لك بالمحابيـل
يخفي بضحكه لك من الحقد زلزال



السن أبيض لكـن القلـب كالليـل
ما كل من يضحك معك يسعد الحال



هذا كلام الحـق مـن دون تبديـل
حبيت اقول الصدق والصدق ينقـال



هذا كلامي فيه بعـض التفاصيـل
شيٍ مجرب ما خرصته من البـال



ولولا المواقف ما عرفت الرجاجيل
وكان استوى بالهرج خايب ورجال


اتمنى تعجبكم خالد